নির্বাচিত পোস্ট | লগইন | রেজিস্ট্রেশন করুন | রিফ্রেস

life is a game . lets make a highscore

প্রফেসর সাহেব

প্রফেসর সাহেব › বিস্তারিত পোস্টঃ

নুরীর বিয়া: আবু সায়িদ রুপিন ( সিলেটী রম্য কবিতা)

০৭ ই জানুয়ারি, ২০১৬ রাত ১২:১৪

কেউ যদি কোন শব্দ না বুঝেন তাহলে জিজ্ঞেস করতে ভুলবেননা,আমি যদ্দুর জানি বলে দিব।

মাজন বাড়ির মাইজম চাচার
হেষের তরফা ফুরী,
কুব কুলীনোর কইন্যা তাই
নাম অইলোগি নুরী।
ফাতলা চিতলা মুখর গড়ন
খমরো ফরে চুল,
হাসির লগে দুই গালো তাইর
আপনে পরে টোল।
এন্ডার লাখান চৌখ দুইওটা
নাখ অবিকল ছুরি,
বাইর দিলাইসে সখাল সখাল
বয়স হেবে কুড়ি।
কতা বার্তা কুব শালিনোর
ফর্দা নিসি তাই,
মনর ভিতর শানদিমাখ
এক্কেবারে নাই।
গত বছর মেট্রিক দিচে
আই এ ফরে এবার,
আমি জানি তাইর ফিছেদি
দিছি খতো লেবার।
কুয়াই থাইক্কা মান্দা উকিল
বিয়ার মাত আনছে তাইর,
আমার হার্টো দিরিম দিরিম
জানো লইছে মাইর।
ফাত লইয়া হুনরাম আমি
দুয়ারো ছিপাত বইয়া,
দামান আইসে দুবাই তাকি
বিয়ার ছরন্দাল লইয়া।
তিন মাসোর ছুটি পাইছে
নয়া লাগাইল এখামা,
আমার লবিং ফস্টে গেছে
কারন আমি বে-খামা।
হুনছি আরো বাড়িত বুলে
দেরিয়া বেশী থাকতো নায়,
খইন্যা যদি ছয়েজ লাগে
কুনতা দেওয়া লাগতো নায়।
ইখান হুনার ফরে আমার
গলা হুকাই কাঠ,
নির্ঘাত আমি রান আউট
অইনা জতই লাট।
চিন্তা করি যা করার
খরতাম অইবো আইজ,
হালারফুত উকিলরে
কেমনে করি সাইজ।
খেউ যাতে টের না পায়
অলা গেলাম বারে,
তার হাতর ছাত্তি লইয়া
বানা দিলাম তারে।
খইলাম তারে উকলাতি তোর
অনকু দিমু বারখরিয়া,
ইনো যে তুই কইন্যা পাইছত
দামানরে দিস না খরিয়া।
সুক্কুর বারে তারিখ দিসস
এক ফাও তুই লরবেনা,
কোন রখম চালাকি ও
আমার লগে করবেনা।
দামান লইয়্যা কইন্যা দেখতো
ফালাই দিছে ডেইট,
ছাছায় কালি ফতমুকা ছাইন
করের কেনে লেইট।
সুক্কুর গেছে শনি গেছে
গেছে ফরু কাইল,
উকিল হালায় মাগনা হুনের
ছাছার মুখোর গাইল।
গাইল দেরা তাইন হুনিয়া আমি
ভাইল এ কই ও ছাছা,
উকিল হকলে জিতা মাতঐন
আধাও নায় আছা।
খইবো দেকবায় নৌশার বাড়ি
ফুকইর আছে দুতালা,
এমন নগদ মাতবো কিতা
বানাইলিবো উতালা।
কইবো আরো জামাইর ঘরোর
চালোর উপ্রে ইট,
ছেপ ফালাইবায় হেনো তুমি
দেখইয়া মুরগির বিট।
মাতোর ফাখো ছাছায় খরা
ব বেটাবে ঘরো,
বইতাম কিতা উকিলনি আয়
আমিও আছি ফরো।
তাইনর কথায় ঘরো গেলাম
মন তো আমার বারে,
ইতা যদি হুনইন ছাছায়
রাখবানি আমারে।
খইবা ফুয়া নিমখ হারাম
আমার বাড়ি আইয়্যা,
হখলে করছইন মায়া তারে
হানোখ ভাঙছে খাইয়া।
নুরীর খানো গেলে ইতা
ভুল বুঝতোও ফারে,
বুঝউকদে ভুল করছি ইতা
ফাইবার লাগি তারে।
আখতা ছাছা গর হামাই
ফাইঞ্জাবি দেইন গাত,
আমারে খইন আয়ছাই লগে
উকিলর ভাঙমু দাত।
আমি অখন করি কিতা
কেমনে দিতাম বুঝ,
ছাছারে কই আপনে তাখঐন
আমি লইরাম খুঝ।
বাজার তাকি ঘুরাই ঘারাই
ছাছারে দেই ডাক,
ছাছায় কইরা উবা বেটা
একজারাতা রাখ।
গামছা ফেছাই গলার মাঝে
ঘর তাকি তাইন বার হইয়া,
কইলাম আমি বানাইল কথা
উছরা তাকি খারঐয়া।
খে বুলে বা বাদ গাইছে
অলা অলা দামানরে,
নুরীয়ে বুলে চিঠি লেখে
উতরো বারির জামালরে।
অখান উইন্যা দুবাই ওয়ালা
খরতোনায় আর খেশি,
আরো রাজ্জির বাজে কথা
হুনার কামনাই বেশি।
উকিলর কোন দুষনায়রেবা
আর না বেটা ডরাইয়্যা,
দামানরে কে বিগরাইলিছে
ইতা- ইতা ফরাইয়া।
ফানিত ফরছে আমিনিরে
বাদ গাউগদে দুশমনে,
"নুরীর বিয়া" তর লগেই
কইলা ছাছায় খুশ মনে।

মন্তব্য ১ টি রেটিং +১/-০

মন্তব্য (১) মন্তব্য লিখুন

১| ০৭ ই জানুয়ারি, ২০১৬ রাত ১:১৩

কালের সময় বলেছেন: ভালো কবিতা ।

আপনার মন্তব্য লিখুনঃ

মন্তব্য করতে লগ ইন করুন

আলোচিত ব্লগ


full version

©somewhere in net ltd.