সরাতঃ

০১ লা জুলাই, ২০২৩ রাত ৮:১৫

আমার সমাজে মানু আগ দো অইলে তেরদিনর দিনে সরাৎ করতারা । হিন্দু শাস্ত্র ইলসি হাবি সমাজে সরাৎ আসে ।
সরাৎ কথা এহান শ্রদ্ধা শব্দ এগৎত জরম অসেগ । দো অসে মানু উগরে শ্রদ্ধা জানানির সালে যে কুমেইহান করতারা, উহানর নাং সরাৎ । আসল শ্রদ্ধা জানানির কাম অর সলপার দিনে । সলপা মানে নিঙে লনা ‌। কুমেই বারো সলপা আকহান নাগৈ । কুমেই উহান করতারাতা গরর মানুগ দৌ অইলে যে শূন্যতা আহান জরম অর ঠইগৎ, উহানরে পাহুরানির কা ।
এতা কামে বামুনর দরকার নেই । সলপার মন্ত্র উতা পুরোহিত দর্পণ বুলিয়া লেরিক আহান আসে, উহানাৎ পেইতাঙাই । সংস্কৃত ঠারে ইকরা । মনেইলে আমার ঠারে অলকরলে মন্ত্র উতার অর্থ হারপানি ইজ্জুম অর ।
এতারে আচার বুলতারা । আচরণ কথা এহানর আরাক রূপ আহান । আচরণ ক্রিয়াগ, আচার বিশেষ্যগ । এতার লগে স্বর্গ নরকর সাকেই নেই । কিয়া বুললে, স্বর্গ কুরাঙৌ নেই, এসাদে কুন ফাম নেই, লয়া নেই । উহান মানুর মনর য়ারিহান । মানু আগ দৌ অইলে জ্বিগৎ সালিগ অর, দাপা আহানে কবর দিতারা ।
যেহান থার, উহান মানু উগর কর্ম । জিংতা অয়া থাইতে যে যে কাম করেসে, উতাই কর্ম । গোকুল কীর্তনী এবাকাউ আমারাং জিংতা অয়া আসে গিরকর কর্মর সালে । দেশর, সমাজর, মানুর হবার কা যেগই কাম করতৈ, উগর কর্ম, যেহানরে কীর্তি বুলিয়ার, উতা অমর অয়া থার ‌।
লহঙ করানি,শৌ জরম দেনা, বি-বারি লনা, দালান হংকরানিরে কীর্তি না মাৎতারা । কীর্তি নেই মানুরে আকগৈয়ৌ না সলকরতারা !
লেখকঃশ্রদ্ধেয় সমরজিত সিংহ। ধন্যবাদ লেখক গরে এসারে মান সম্মত লেখা লেখনির কা।

০ টি +০/-০