আজারুদ্দিন লেই ল (চট্টগ্রামী ভাষার গল্প)

১৫ ই জুলাই, ২০১০ রাত ১১:২৫

আজারুদ্দিন লেই ল

কাফি কামাল



ক.

দুইরগ্যা ভাত হেইয়েরে আতিনা ঘরত এক্কেনা হাইতই পরগিল আদ্দু ছোয়ান। আইজ-হাইল রাতিয়া সঁজে ঘুম ন আইয়ে। বয়সঅর হারণে শরীল্লান বউথ ঝটকি গেইয়ে। এতল্লাই দুইরগ্যা ভাতহেই হাইতই পইল্লে এক্কেনা ঘুম আইয়ে। এ্যান সঁত কেয়াই ওঁজর-আজর গইল্যে গমগরি বিরত্ত লায়। তই দুইরগ্যা তেই ঘুম গেইলে কেউ আশে-পাশে ডঁর গরি হতা-বাত্তারা ন হয়। কিন্তু আজিয়া পত্থ্যুয়া মাইনস্যর ওজঅর ওনি লেড়াত্তুন তার ঘুম ভাঁই যাগই। লেড়াত্তুন ওড়ি দেহে ওড়ানত মোরালই বই মাথা আচুরের পোয়ার বউ জইলা হাতু। তেইরে দেই আদ্দু ছোয়ান ডাক দে- কি রে অড়ি মালেকর বউ হনদি কি অইল? এ্যাত ওজঅর ক্যা?

জইলা হাতু তরাতরি চুলর ঝুঁড়া বাইনতে বাইনতে অওররে জোয়াব দে- হাজির বিলত নেকি হন্নেল বদি আমদ আইয়ের। চাইরমিক্কাত্তুন মানুষ ভাঁই পইরগ্যে। এতল্লাই পত্থ্যুয়া মাইনস্যে গঁ গঁ গরেদ্দে।

পোয়ার বউঅর জোয়াব ওনি আদ্দু ছোয়ানত্তুন হালিয়া আজুইন্যার হতা মনত পরে। পারার চাদ্দোয়াত ডঁঅর গরি ডাক মারি মোবারক মেম্বারে বেয়া¹ুনঅরে দঁঅত দিইলত। গলাত নেইযে ক্যাড়া বাইজ্যেপান ক্যাত ক্যোত গরি হয়- ওবা তোয়ারা বেয়া¹ুন হালিয়া আজুইন্যা হাজির বিলর ভাঙ্গার গোরাত যাইঅ। মনতিরি সাব আইব। বউত হস্ট গরি মেজর বদি আমদরে রাজি গরাইয়ি। তই তোয়ারা যেইলে তেই খুশি অইব। এবার তেই হতা দিয়ে ভাঙ্গা চাইযেই সংসদত হতা হইব। অত্ত মনতিরিত্তুন বেশিগরি বরাদ্দ আনি ভাঙ্গা বাঁধি দিব। মনতলার আদ্দু ছোয়ানর বারিত্তুন আধামাইল দূরে বাক্কেলারঅ কুমত ডলু হালর ভাঙ্গা। এ্যাডে মিটিংয়ত মনতিরি আইয়েদ্দে ইয়ানঅ পঁরি ফেলাইয়ে। আছলে আদ্দু ছোয়ানত্তুন আইজ-হাইল হতা-বাত্তারা মনত ন থাহে। বেয়া¹িন উল্ডা-পুল্ডা আওলাই যাগই।



খ.

মনতিরি মেজর বদি আমদ হাজিঁর বিলত আইয়ের বলি ওনি সিদ্দার পারার রাইব্যনিত্তুন ঈবারে চাইত যাইত মনে হয়। বউত বঁর মনতিরি। এ্যাদিন্না পোয়ারে ডাক্তরহানাত লঈগেইলদে এ্যাডে ইবারে লই মাইনস্যরে গপ মাইত্তে ওনে। মাইনস্যে নেকি যিয়ান চায় ঈয়ান দে। গতবারত ঈবারে ভোটদিতঅ যাই আধাপথত্তুন ফেরা আ পরগিল রাইব্যনিত্তুন। পুকপারা জইরগ্যা বঁর এ্যাদ্দুর জঅনর পর মোজাফইরগ্যা আক্কুর হতা ওনি রাইব্যনি ঘর ওজু ফেরত আইয়ে। রাইব্যনিরে দেঈ মোজাফ্যরগ্যা আক্কু ডাম্মারে- অঁড়ি ঈক্কা ন জাইচ। সেন্টারর ঈক্কা গমগরি গন্ডোল ল্যাইগ্যে। রাইব্যনি কিছু পোচার গরিবার আগদি মোজাফইরগ্যা আক্কু হঈ ওড়ে- উতুর পারা নজিরামইদ্যার পোয়ার বউঅরে লই জনমঙ্গল পাটি এদ্দে জনহল্যান পাটি অক্কলের ভিতর অঠাত গরি মারামারি লাই গেঈঅই। উন্নিদে ঈবারে নেকি জনহল্যান পাটির পোয়া অক্কলে রিস্বাত গরি সেন্টারত লইগেইয়ে। কিন্তু ভোটর সিলিপ লই জনমঙ্গল পাঁটি অক্কলে ঈবারে ডল্লাগাইয়ে। হইয়ে দে সূজ্জত ভোট নদিলে বউত অসুবিধা অইব। ঈয়ান উনি জনহল্যান পাটি অক্কলে ঈতারে মাইত্য গিয়ে। তারপর এ্যানে মত্তর দুনো পাটির ভিতর হজ্জিয়া বাজিগেইঅই। দুনো পাঁটির মারামারি দেঈ ডরে পুরা সেন্টার উদ্দা হালি অঈ গেইঅই। এ্যতল্লাই হইদ্দে ভোটদি ক্যান গরিবি, যা গরত যাগঈ। মোজাফফরগ্যা আক্কুর হতা উনি রাইব্যনি সেন্টারর ঈক্কা আন্নজায়। ঈয়ার আগরবার ভোটদি ত যাই- তেঈর বেই আদ্দু চফুর হজ্জিয়ানেইজে বারি হাই আঁত ভাঈ ফেলাইল। ঈয়ান মনত পরঅনর ফোয়ারে ফোয়ারে রাইব্যনি পিচ্ছে আঁড়া ধরে। কিন্তু শেষ পইজ্জ্যন্ত জনহল্যান পাটিই জিততে। তালগাছ মারহা ভোড়ত থিয়াই জনহল্যান পার্টির মেজর বদি আমদ বউথ ভোড়ে জনমঙ্গল পাটিরে ডিপিড দিয়ে। তেইঅ মনতিরি অইয়ে। রাইব্যনি ভোট দিন্নপাইল্যেঅ নিজর পছন্দর প্যাত্তি মনতিরি অওনে মনে মনে খুশি অয়। তই বউদ্দিন ধরি রাইব্যনিত্তুন মনে অয়- যদি এব্বার তেইরে ছাম্মাছাম্মি দেইখতাম।

রাইব্যনি মনতিরি সাবঅরে চাইবাল্লাই ভাঙ্গার গোরার শেষ মাথা সাইফ্যা বঁরত যায়। গুরা মরত পোয়াওয়া হোলত আর মাইয়াওয়া আঁতত ধরি সাইফ্যা বঁর ওড়ানত যাই থিয়াই। দেহে এ্যান্ডে তেইর ডইল্যা আরাইল্লা-পারাইল্যা আরঅ বউথ মেইয়া পোয়া আই ভরি গেইয়ে। তেইঅ ইতারার ফোয়ারে ঝলির এ্যারোদি হদ্দুর দুরে ভাঙ্গার গোরার ইক্কা খেয়াল গরি চায়। বেয়া¹ুনর অপেক্ষা হত্তে আইব- হতক্ষনত আইব। মাইয়া পোয়া অক্কলে মেজর বদি আমদঅরে এন্নজর চাইত যেই নিজেরাই গপত বঈ যাগই।

পুকপারার মদিনার মা উতর পারার ধইল্যা বুরিরে হঁয়- মনতিরি যেত্যে এইয়ের অবু এবার ভাঙ্গায়ান নিশ্চই বাধা অইযাইবই।

ধইল্যাবুরি হতা হারিলই হঁয়- ইঁন কি হতা অবু। ওন্নিদে আঁরার মনতিরি ইবায় চাইলে নেতি হালকুল উদ্দা বাধি ফেলঅন হঅ বিষয় নয়। ইতারা গোড়া দেশ চালাদ্দে নয় না।

উতুর পারার সখিনার মাঅ সুযোগ বুঝি জিরপা লারে। হঁয়- আঁরার দেশইত্যা মানুষ মনতিরি অইয়ে- ইয়ান আঁরার দেশইত্যা অক্কলর আঁত খোয়াল।

মাইকত এহনই আইব, এহনই আইব হদ্দে ওনি হতক্ষন বাদে বাদে মাইয়া পোয়া অক্কলে ঝলির এ্যারোদি হাপ্পুয়াই চায়।



গ.

বেয়া¹ুনে জানে মোবারক মেম্বার আগামীবার চেয়ারমেনি ভোট গইত্য চাঁর। এতল্লাই ডঁঅর ডঁঅর জাগাত নেইযে দৌরা দুরি গরের। এবার মনতিরিরে আনি ভাঙ্গাগান বাঁধি দিথ ফেইল্লে তেইর চেয়ারমেনি আর কেয়াই ঠেগাইত ন পারিব। গতবার ভোড়র পরত্তুন লঅতি মোবারক মেম্বার এদ্দে নুরামদ সিদ্দাল্লয় বাঁআ মইষর আল চলের। মোবারক মেম্বার নোয়া আঁলর পইশাঅলা এদ্দে হমতাশালী অইলেও নুরামদ সিদ্দারর পুরান হাইল্ল্যা ভাব ন যায়। এলাহাত মোবারক মেম্বারে কিছু গইত্য চাইলেই নুরামদ সিদ্দারে ঝামিলা গরে। এ্যাই ভাঙ্গার ব্যায়াপারেঅ জনমঙ্গল পাটির নুরামদ সিদ্দারল্লাই বলি এপ্পেরগুয়া মেডিঅ ফেলাইত ন পারে কাতলবিলা ইউনিয়ন পরিষদে। পইত্যবার মানুষজন আইলেই বাধা দে নুরামদ সিদ্দারে। হঁয়- আঁর জবিনত্তুন এহহোদাল মেডিঅ লঁঅন যেইত নয়। তোরার জবিনর ওঅরদি য্যান মনে হয় এ্যান গরগই। এ্যাই হতা হই থোরা কিছু জবিনরে পুজি গরি তেই ভাঙ্গার অসুবিধাগান ঝিয়াই রাইখ্যে। উদ্দেশ্য অইলদে মোবারক মেম্বাররে ছাম্মে আগাইত ন দঁঅন। মোবারক মেম্বারঅ হম ন যায়। বউথ ডইল্ল্যা বাধা বিপত্তি হাড়াইয়েরে এদ্দুর আইস্যে। এ্যাই ভাঙ্গার ব্যায়াপারেঅ জনহল্যান পাটির আজারুদ্দিন এদ্দে নুরালম সিদ্দারররে লই দৌরা-দুরি গরি মনতিরি সাবঅরে রাজী গরাইয়ে।

এ্যাইদিন মনতিরির বাসাত যেই এম্মাদান বই থাহনঁর পর মোবারক মেম্বাত্তারার ডাক পরে। মোবারক মেম্বার মনতিরির ছাম্মদি যেই ছালাম দি থিয়ায় থায়। ছিদিক মাস্টরঅ ছালাম দি এক্কান চেয়ারত বইয়ে। মনতিরিয়ে তারারে দেঈ পোছারগরে- কিরে মোবারক কিল্লাই আইস্যজ্জদে? মোবারক এম্মিকা চাই হঁয়- অদ্দা আঁরার এলাহাত ডলু হালঅর ভাঙ্গাআনর ব্যায়াপারে আস্বিলাম দে। অঁনত্তুন এক্কেনা এন্ডে যঁন পরিব।

মেজর বদি আমদ চঅরিত্তুন অবসল্লই হয়েব্বছর আগে জনহল্যান পাটিত যোগদে। কিন্তু রাজনীতি গইত্যদে ঢাহা শঅরত থাই। গতবার অঠাতগরি এমপি’র নমিনেশন পেইয়েরে এলাহাত আইয়েরে বেয়া¹ুনল্লয় পরিচয় গরে। তই ভোড়তস্বত বদি আমদে তেঈ নির্বাচনী এলাহার চেয়ারম্যান-মেম্বার অক্কলরে লই হয়েব্বার মিটিং গরগিল। এ্যাইসঁত কেয়াই কেয়াই ছাঁর ডেইক্কে এদ্দে তেঈ গরম অই গেইলগই। এ্যাইদিন হঁইল- আঁই তোয়ারার এলাহার পোয়া। আঁরে তোয়ারা ছাঁন্নয় ভেই বদ্দা ডাইলেই আঁই খুশি অইয়ম। এ্যাই হতা মনতগরি আজিয়াঅ মোবারক মেম্বারে বদি আমদঅরে অদ্দা ডাহে।

মনতিরিঅ জানেদে মোবারক আইদ্দেবারত কাতলবিলাত চেয়ারমেনিত থিয়াইব। এলাহাত হনে কি গরের গোপনে তেই ইঁনর হোজ-হবর রাহে। জনহল্যান পাটি অক্কলেই জানাইয়েদে মোবারক মেম্বার আইদ্দেবার চেয়ারমেনিত থিয়াইব। তঁ মোবারকত্তুন পোছার গরে- তুই নেকি আইয়েদ্দেবার চেয়ারমেনিত থিয়াবি?

মোবারক মুচকি আঁসি আস্তে গরি জোয়াব দে- অঁনরা দোয়া গইল্ল্যে এ্যারি অদ্দা।

মনতিরি আবার হাজর হতাত এ্যাইয়ে। তই আঁই গেইলে এ্যাডে মানুষজন ক্যান অইব?

আঁজার আঁজার মানুুষ অঁইব অদ্দা। আঁরা মাইকত পাবলিসিটি গরি মানুষজ্জন যোয়ারগইরগ্যম।

এবার মনতিরি স্বস্তির নিয়াশ ফেলাই হঁয়- আইচ্ছা ঠিক আছে আঁই যাইয়ম। তঈ আঁই হনদিন যাইত্যাইরগম ইয়ান পরে তোরা আঁর পিয়েসত্তুন তারিক্কান জানি লইস।

মনতিরির হতা পেই মোবারক মেম্বার এদ্দে ছিদিক মাস্টরে খুব খুশি অঁয়। বুক ফুলাই এলাহাত ফিরে। দুনোজরে এলাহার আঁট-বাজার, দোয়ান-পাঁরিত মানুষজ্জনরে ডঁর ডঁর গরি ডাহি মনতিরির দঁত হবুল গরঅনর হবর দে। পরে মনতিরির পিয়েসত্তুন তারিখ লই মিটিংঅর দিন ঠিক গরে। তারার চেইমচা অক্কলে চাই-রমিক্কা আঁরাদিনটিয়া পচার গরে।



ঘ.

ডলু হালর পার ভাঈ হাঁজির বিলর ঈন্দি যাইবস্বত মনু মিজ্জিত্তুন যোয়ান হাল্ল্যা হতা মনত পরে। এস্বময় রাতিয়া ঈন্দি আড়িবস্বতি ডরে গা-আঁতে জিঞ্জিনাইত। হাঁজির বিলর এ বাক্কেলারঅ কুমত নেকি জিন-পরির বসোয়াস আছিল। বাপ-দাদা অঁলে জিন-পরির হতো গপ মাইত্য। হত জনঅরে নেকি রাতিয়া আড়িবাস্বত নানান কিছুর ছন্না ধরি ভুত-পেরত অক্কলে দেহা দিত। ধোয়ারভাঁর মাজঅদি লাম্বা তুলার গাছর গোরাত আইলে বেয়া¹ুনে দোয়া-দরুদ পরি সিনাত ফু দি জোরে হেইমাইত্য। এহন বাক্কেলারঅ কুম নাম আছে আগর এ্যাই কুম নেই, তুলাগাছও নেই। মাইস্যর লালছি এদ্দে ডলু হালর মজ্জিয়ে এহর আর কেয়াই ডরাই সিনাত ফু নদে। উল্ডা ঈন্দি আড়িবস্বত নুরামদ সিদ্দারর মারে-বইনঅরে হঅর তুলি গাইলদে। গাইল দিবার হতাঅ। বিত্তিরিশ বছর ধরি হাঁজির বিলর পাইন্যাস্যা আঁলর পানি দে তারঅ গোষ্ঠীয়ে। ডলু হালর গোধা বাধি দমহল বোয়াই পাইন্যাস্যা জবিনত পানিদি হানি প্রতি টেয়া লইত। তেয়াদা বছর দমহলর বদইল্যা হালরপার হাড়ি জান বোয়াই পানি দিত যাই আজিয়ার এ অবস্থা। গোধার পানি যেত্যে পুরাইয়েরে টিট্টিপ অইয়ে অড়াত গরি নুরামদ সিদ্দারর মাথাত শতাইন্যা বুদ্ধিয়ে বাঁ বাধে। এদ্দিন দমহল বন্ধ গরি গোধার ওঅরদি গরি হালর পার হাড়িয়েরে দুইয়ান জান বোয়াইদে। গোধার পুরাইয়া পানি জানদ্দি অরঅরাই জমিত যাগই। নুরামদ সিদ্দারত্তুন আর দমহলর ডিজেল এদ্দে কাআরনর খরচ বাচি যাগই। জানর গোরাত ডোর বোয়াই প্রত্যদিন দুই-চাইর পাচকেজি মাছঅ পায়। তঈ পার হাড়ি জান বোয়াইলে এলাহার মাইনস্যে তেঈরে ..... দে। কিন্তু নুরামদ সিদ্দারে ঈনঅরে আমলত ন লয়। উল্ডা এদ্দিন পুকপারার নেইছ্যারে এ্যাই হতাল্লাই মেইত্য ওড়ে।

জুমার নোয়াজত্তুন বাইরই এদ্দিন নেইচ্ছ্যা নুরামদ সিদ্দারর ছাম্মদি থিয়ায়। অদ্দা এক্কান হতা হই-ত চাইদ্দে।

কি হতা? নুরামদ সিদ্দারর গলাত তাচ্ছিল্য।

নেইচ্ছ্যা সুন্দর গরি হঁয়- অদ্দা জান্নান বোয়াইঅনদে এতল্লাই রাইত-বিয়ালী বুরা মাইনস্যত্তুন আঁইটত্যে অসুবিধা অর। এদিন্না সোলেমাইন্ন্যা আক্কু উজাড় হাই জানত পরি গেইলগই। তই জান্নান বাধি দিলে অদ্দা গম অই-ত। মাছ-ত গোধা পুয়াইলে জাগদি চাইত্যারিবা।

এবার নুরামদ সিদ্দার গোস্বায় ফালদি ওড়ে- কি হই-ত ছঅস? আঁর গোধা আঁর জবিন আঁই যিয়ান মনে হয় ইয়ান গইরগ্যম। তোরা আড়িন্নপাইল্যে অন্যমিক্কাদি আঁড়গই।

দুই-চেইরবার মাইনস্যল্লই এন্ডইল্যা হতা হাড়াহাড়ি অঁনর পর পাইন্যাস্যা জবিনত পানি বন্ধ গরি দিবার ওমকি দে। ইয়ারপর আর কেয়াই কিছু ন হয়। অন্যান্য বছর বারিশাহাল আইবার আগদ্দি গোধা হাড়ি দিলেঅ এ্যাই বছর মাছর হারণে গোধা হাইট্য দেরি গরে। গোধার পানি হমি গেইলে এড়ে ছোয়া ইছা মাছর হারবার দেঈ নোয়াগরি শতাইন্যা বুদ্ধি আইয়ে নুরামদ সিদ্দারত মনত। গোধার ওঅর মিক্কা আধা মেইল অল্প পানিত জাগ ফেলাই দে। ইয়ার ভিতর মাছর খেলা দেঈ নুরামদ সিদ্দারল্লই এলাহার আরঅ কিছু টেয়া পইসা অলা ভিরে। তারপর দুই-চেইদ্দিন বাঁআদে বাআদে একেক্কান জাগ গিরে আর মাছর গাড্ডি লই তারা গরত যায়। এ্যান গইত্যে গইত্যে বারিশা নামে। পইল্যা এদ্দিন দুই-এল্যাচা জদ্দিঅ গোধাত পানি এ্যান নবারে। কিন্তু হয়েদ্দিন বাঁআদে রাতিয়া এ্যান ঝরঅয়। পদ্দিন বেইন্যা আরাইল্যা-পারাইল্যা অঁল ঘুমত্তুন ওড়ি দেহেদে পাঁআরগ্যুা ঢল নামি গোধাঅ ভাঙ্গি হাঁজিরবিলর ছেইডদি হাল অই গেইয়ে। গোধা ভাঈবার আগদি জান ভাঙ্গি পানি হাঁজির বিল ঈক্কা ঝাম্মারনে বিলর ধানচইল ত নষ্ট অইয়েদে অইয়ে বিল বেয়াগ¹্যুা ডলু হালর বালু ওড়ি চর অইগেইয়ে গই।

চেয়ারম্যান- মেম্বর অঁলে হাল হাছাঅ বাঁধি ন দে, মাইনস্যে হাঁজির বিলত কেয়াই আলচাষঅ গরিত ন পারে। কেয়াই কেয়াই জবিনর বালু সরাই আঁল গইল্ল্যেঅ ধান হয়দে ঈন ন অয়। গত বছর বারিশাত আবারও হালর পানি ওড়ি এব্বেরে ধনশ অইগেইয়েগই। তিনঅ পারাইল্ল্যা অঁলে মিলি হালহাছা বেইনত চাইলেঅ নুরামদ সিদ্দারে হজ্জিয়া বাজাই হাম বনধ গরি দে। হারণ হালহাছার তার জবিনত্তুন নেকি এপ্পেরগুয়া মেডিঅ হাড়া যেইত নয়। মেডি হাড়িলে নেকি তাজ্জবিন গাড্ডা অই যেইবই। এট্টাল পোয়াছা এদ্দে পইশা-হরি লই এক্কেনা লরি ছরি হঁনে কেয়াই তাল্লয় সঅজে বাইজধ ন চায়। এ্যাতল্লায় হাঁজির বিলর ডলু হালর হাছা আর বাধা নঅয়। তঈ গত তিন বছরে দেইখতে দেইখতে পঞ্জাইশ আঁতর ভাঙা ইয়ান পাশশো আঁত অঈয়ে। এতল্লাই এহন আর নিজেরার টেয়াদি এত্তবরঅ ভাঙা বেইনতে সাহস ন পায়। এহন পোয়া ছা অক্কলে আজুইন্যা অঈলে হাঁজির বিলত বল খেলা হায়। রাতিয়া মঅল খেলা, চি খেলা হায়। ইন্দি দুইতিন বছর ধরি নানা চেষ্টা তদবির গরঅনর পর এলাহার চিদিক মাস্টর এদ্দে কাতালবিলা ইউনিয়নর মোবারক মেম্বারে জনহল্যান পাটির নেতা নুরালম সিদ্দাররে ধরি ছ-আতবার ঢাহা শঅরত যেই হতায়ান মনতিরি সাবঅর হানত তুলে। ঈয়ারপর মনতিরি সাআবউ কাতালবিলা ইউনিয়নত ভোডর পচার চালাইবাল্লাই ডলু হালর হাছা ভাঙাআন চাইত যেইতে রাজি অয়। মনতিরি সাবঅরে রাজি গরাইত পারি চিদিক মাস্টর এদ্দে বশির মেম্বর এলাহাত পচার গরে। আগামী এ্যাত তারিখ হাঁজির বিলর ভাঙা চাইবাল্লাই মনতিরি আইবো। তেঈ সরগারত্তুন বরাদ্দ আনি ঈয়ান বাধি দিব। এলাহাবাসীঅ চিদিক মাস্টরন্নান মাইনস্যর হতা উনি নোয়াগরি আশা গরে। মনতিরি আঈলে নিশ্চয় এবার ডলু হালর ভাঙ্গাগান বাধি দিব। আগামী অঁনমাইস্যাত্তুন আলচাষ গরা যাইব।



ঙ.

আদ্দু ছেয়ান লেডাত্তুন ওড়ি অঁরহাওয়া গঁত দি হাজির বিলর ইক্কা যায়। পত্থ্যুয়া মাইনস্যল্লাই আঁড়া ন জার। বউত দুরত্তুন দুরত্তুন মানুষ আইয়ের। হাট্টল্যাপারাত্তুন জোয়ান পোয়া অক্কলে মিছিল গরি গরি হাজির বিলত যার। আদ্দু ছোয়ান তারার পিছঅদি পিছঅদি ভাঙ্গার ইক্কা আঁড়ে। যেই দেহে ভাঙ্গার গোরাত মাইনস্যল্লাই টেং দিবার যাগা নেই। আইজঅ মনতিরি নঁ পঅছে। মনতিরি আইবদেই হেই হেই পাটির নেতা হর্মী অক্কলে মাইকত স্লোগান দে- ‘আঁর বেই, তোয়ার বেই- বদি বেই, বদি বেই’, ‘বদি বেইঅর দু নয়ন এই এলাহার উন্নয়ন’ এন্ড্যল্ল্যা-এন্ড্যল্লা।

আছরর নোয়াজর পর মুঅত্তে মনতিরি আইস্যে বলি মাইকত ঘোষণা দে। তহন বদি আমদঅ মাত্তর পচিম পারার চাদ্দোয়ানর ছাম্মদি আই পওছে। পত পত গরি বাংলাদেশের পতাকা ওরাই ওরাই সাদা এক্কান পাইজারো গারিত গরি তেই চাদ্দোয়ানর চাম্মদি আই নামে। তেইর গারির আগে পরে দুইয়ান পুলিশর গারি। জনহল্যান পাটির নেতা হর্মী অক্কলর গারিঅ আছে হয়েক্কান। গারিত্তুন নামি বদি আমদ নেতা হর্মী অক্কলল্লাই হতা হইতে হইতে ভাঙ্গার গোরার ইক্কা যায়। নেতা হর্মী অক্কলল্লাই এলাহাবাসী কেয়াই তার হাছেঅ যাইন্নপারে। দুরত্তুন মাইনস্যে আঁত্তুলি ছালামদি শরি যায় আর বদি আমদ আঁত এদ্দে মাথা লারি লারি আঁড়ের।

বদি আমঅদর আইয়ন উপলক্ষে মোবারক মেম্বার ভাঙ্গার গোরাত ডঁর গরি এক্কান মঞ্চ বানায়। মঞ্চর চাইরঅমিক্কা দি দুইরগ্যাত্তুন লঅতি জনহল্যান পাটির নেতা এদ্দে এলাহার চেয়ারম্যান মেম্বার অক্কলে গোলদি থাহে। দুইরগ্যাত্তুন লঅতি বকতিতা দিবাল্লায় জনহল্যান পাটির নেতা অক্কলে স্পিরিকার লই হাঁরাহারি গরে। বেয়া¹ুনে নিজরে এলাহাল্লায় হতায় হতায় হোরবান গরি দে। মনতিরি ন আইয়ন পইয্যন্ত কেয়াই মঞ্চত ন ওড়ে। তই বদি আমদ ভাঙ্গার গোরাত পওছঅনের ফোয়ারে ফোয়ারে পোয়া-বুরা বেয়া¹ুনে মাইকত স্লোগান দিতে দিতে পুরা এলাহা মাথাত তুলে। নেতা অক্কলে তেঁইরে মঞ্চত লইজাই বোয়াগরায়।

মনতিরির ছাম্মদি মাইকত বকতিতা দিন্ন পারি জনহল্যান পাটির নেতা রফিক মিয়া এদ্দে ফোরকানামদ মঞ্চর নেইজে তরহাতরহি শুরু গরি দে। রফিক মিয়া হঁয়- আঁই এজ্জুগ ধরি পাটি গরিদ্দে আঁরে হতা হইত দঁন পরিব। জোয়াবে ফোরকানামদ নাক ভেঙেড়ি মারি হঁয়- যারা জনমঙ্গল পাটিল্লয় তলে তলে আঁত গরি চলে মাইনস্যে ইতারার হতা ওইন-ত ন চায়। তরহাতরহি দেহি মনতিরিয়ে ধঁক মারে- তোয়ারা ইঁন কি শুরু গইল্ল্যা।

মনতিরির ইশারা দেই আজারুদ্দিন তরাতরি গরে। মেজর বদি আমদঅর সময় হম। এহন আবার শঅরত ফিরঅন পরিব। এতল্লাই ছিদিক মাস্টরে এলাহাবাসীর পক্ষত্তুন মনতিরিরে ধন্যবাদ দে। এলাহার জনহল্যান পাটির সভাপতি নুরালম সিদ্দার ওড়িয়েরে মাইকত বকতিতা শুরু গরে। দুইরগ্যাত্তুন লতি এলাহার যেসব নেতা এদ্দে চেয়ারম্যান মেম্বার অক্কলে মুখত ফেনা তুলে আর মনতিরির চাম্মদি এক্কেনা বকতিতা দিতঅ চায় তারার আ¹রহত পানি পরে। নুরালম সিদ্দার মনতিরি সাবে এলাহার কি কি উন্নয়ন গইরগ্যে আর গইত্য চাআর ইঁনঅর এক্কান লিস্টি হঁই যায়। নুরালম সিদ্দারত হতা শেষ অঁনের পর এলাহাবাসীর পক্ষত্তুন মোবারক মেম্বার ওড়ে। পইল্যা হতক্কন মনতিরির নাম গরি তেঁঅ মুখত তুলে। শেষঅদি ডঁঅর গরি ডলু হালর ভাঙ্গাআন বাঁধিবার দাবি জানায় বদি আমদঅর হাচে।

বদি আমদ থিয়াই উপস্থিত মাইনস্যর ইক্কা চাই আঁত লারে। মাইকর স্পিরিকারগুয়া আঁতল্লই বেয়া¹ুনঅরে ছালাম দে। এলাহাল্লাই নিজর বিভিন্ন উন্নয়নর হতা হইতে হইতে মাইনস্যর আঁত্তালী লয়।

ইন্দি ঝলির এ্যারোদ্দি বদি আমদঅরে গমগরি দেহা ন যায়। তঁ মাইকত ইবার হতা ওনি হালা হোট পইরগ্যা মনতিরি বদি আমদঅরে এন্নজর আবছা গরি চাই লয় মেইয়াপোয়া অক্কলে। মুখত লাম্বা লাম্বা মোচঅলা বদি আমদঅরে এ্যাত্তিয়াররজ্জবনার বলি অক্কলন্নান লায়।

বদি আমদ চাটগেইয়াল্লয় শুদ্ধ ভাষা মিয়ায় বকতিতা গরে। উপস্থিত মানুষজ্জনে আঁ গরি তেঈর হতা ওনে। শেষদি গরি জনহল্যান পাটির উপজেলা সভাপতি আজারুদ্দিনর ইক্কা চাইয়েরে হয়- এ্যাই আজারুদ্দিন এলাহাবাসীর দাবিয়ান লেই ল।

মনতিরির হতা ওনি ভাঙ্গার গোরাত আঁজার আঁজার মাইনস্যে জোরে জোরে আত্তালী দে। মাইনস্যর ডইল্ল্যা বুরা আদ্দু ছোয়ানঅ আত্তালি দে। এলাহাবাসীর হাছে মোবারক মেম্বারর মুখ পঁঅর অয়।

বকতিতা ভাঙ্গা বাধ দঁঅনর ওয়াদা গরি বদি আমদ মঞ্চত্তুন আবারঅ চাইরমিক্কা চাইয়েরে আঁতলারে। আগত্তুন লঅতি তেইর গারিগান ভাঙ্গার গোরাত আনি রাক্কিল ডেরাইভার অক্কলে। মাইনস্যর আঁত্তালির আবাচর ভিতর তেই মঞ্চত্তুন নামি গারিত ওড়ে। মুঅত্তর ভিতর এলাহাবাসীর আশাগান জেপত ভরি বদি আমদ চওগর আড়াল অইযাই।



চ.

মনতলার বশিরুদ্দিন চইধরীর মেইজ্যা পোয়া আজারুদ্দিন চইধরী। বাপর নামঅর ওপর পাটি-তাটি গরে। যহন যারা হমঅতাত থাহে তহন তে এ্যাই পাটি গরে। এ পইয্যন্ত হয়েম্মত্তা পাটি বদঅলাইয়ে। এহন জনহল্যান পাটি গরে। বয়সহালে বিয়াসাদি ন গরঅনে পোয়াচা বেয়া¹ুন এহনঅ ছোড় ছোড়। আঁরা দিনটিয়া বতল্লই পরিতাই। পইত্য বছর আঁট বাজারর নিলাম ডাহে। এলাহার গুন্ডা-পান্ডা অক্কলরে চালায়। সস্বময় দুইচাইরজন আলতু-ফালতু লই চলাফিরা গরে। মানুষ জনে ছাম্মে পইল্যে ছালাম-তালাম দিলেও পিছদি গেইলে আঁতগোষ্ঠী ধরি গাইল দে। তই গতমত্তাত জনহল্যান পাটির বদি আম্মদল্লাই ভোট গরঅনে এহন তার হমতা হনে চার। বদি আমদএ তারে বেশি বিস্বাস গরে। হারণ বতলপাটি আজারুদ্দিন বদি আমদঅর ইশারা বুঝি চলে। কেয়ারে ধরি আইন-ত হইলে বাধি আনে। এতল্লাই বদি আমদ এলাহাত আইলেই তার ডাক পরে। হনঅ মিক্কা যাইবর সত তারে পোয়ারে লই যাই। এলাহার মাইনসে হনঅ অবাব-অভিযোগ গইল্যে বদি আমদে মাইনস্যরে ওনাইয়েরে আজারুদ্দিনরে হয়- আজারুদ্দিন লেই ল। আজারুদ্দিন পুরান ও¹্যা ডাইরিত পোয়ারে পোয়ারে লেই লই। বদি আমদত্তুন ওইনতে ওইনতে এহন মাইনস্যর মুখে মুখে অইজাগই। তারে দেইলে মাইনস্যে এ্যারে-ওরে হয়- আজারুদ্দিন লেই ল। আস্তে আস্তে ভাইরাছর মত হতাইয়ান ছড়াই যাগই। হতায় হতায় এজ্জনে আরেজ্জনেঅরে হয়- আজারুদ্দিন লেই ল।



ছ.

মেজর বদি আমদ ভাঙ্গার মুখত আইঅনর পর মাইনস্যর আলাপ-আলোচনা আর চাদ্দোয়ানর গপর আশয়-বিষয় পাল্টি গেইঅই। বেয়া¹ুনে এহন বদি আমদঅর প্রতিশ্রুতি লই আলাপ গরে। কেয়াই হয়, মেডিদি ১০ ফুট ওচল আর ১২ ফুট চওড়া গরি ভাঙ্গার বাধি দিব। আবার কেয়ায় হয়, পাত্তর ঢালাই গরি দিব দেই হাম শুরু গইত্যে দেরি অদ্দে। এ্যাদিন্না এজ্জনত্তুন আদ্দু ছোয়ান ওনিল দে- মনতিরিয়ে নেলি হইয়ে দে বাঁধত দশাজার গাছর চারা রুই দিব। এ্যাই হতা ওনঅনের পর বেয়া¹ুনে কি গাছর চারা লাগাইলে গম অইব ইয়ান লই গপ মারে। গপর শেষ নেই। জনহল্যান পাটি অক্কলে বদি আমদঅর হনে হদ্দুর হাচে যেইত্তারগিল ইনলইঅ মুখর ফেনা ছুড়াই ফেলায়। চাদ্দোয়ানত বই ইতারার আলাপ-আলোচনা ওইনতে ওইনতে আদ্দু ছোয়ান সপ্পনত দেহে। ওচল বাধ ওইয়ে, বাধর দুনো সাইডদি আজার আজার গাছ রুইয়ে, হাজির বিলত আবারও মাইনস্যে পাইন্যেস্বা রোয়া রুইয়ে ... হত কিছু।

রাতিয়া মনতলা চাদ্দোয়ানত বই আদ্দু ছোয়ান দুধ-চিনি বারাই দি ও¹্যা চা’র অডার দে। চা’ওয়া তার চাম্মদি আইবার আগদি বদি আমদঅর হতা লই- ছবুর কোম্পানীর পোয়া আশিক্কাল্লয় রশিদ হন্ডাকদারর পোয়া ছলিমউদ্দিনল্লয় তরহাতরহি শুরু অইযাগই। আশিক্কা হঁয়- হবর পেইলাম দে বদি আমদে তরাতরি হাজ শুরু গরি-ব। ছলিমউদ্দিন তারে ঠেসআ গরে। অয় ওবা বই থাহ, বদি আমদে বাধল্লাই নেকি অত্তমনতিরির থইলা লই আইব। জনমঙ্গল পাটির সমর্থক ছলিমউদ্দিনের ঠেসআ ওনি জনহল্যান পাটির আশিক্কার মাথা গরম অই যাগই। ফোয়ারে ফোয়ারে জোয়াব দে- এ্যান ক্যা হইলা ওবা। দরহার অইলে থইলা ক্যা আরও কিচু হারি আনিব। বদি আমদে এলাহাল্লাই বউত হাজ গইরগ্যে। ছলিমউদ্দিন আবার গুতআ মারে- হাম তো পইত্যদিন গরের। আজারুদ্দিনঅ লেই লইতে লইতে ডাইরি পুরাই ফেলাইয়ে। তারার তরহাতরহির ভিতদ্দি আদ্দু ছোয়ান চোখ আঁড়াই চায়- আছলে ত। ছলিমউদ্দিনর হতাই ত ঠিক বদি আমদ সাবে ওদাওদি ওয়াদা গরেদে এ্যানা। হন মিক্কা হাম ত ন গরে। গত অঁন মাইস্যা চুনতি এড্ডেইক্যা আটখোলাত্তুন বঁরাইত্যা পইয্যন্ত রাস্তার দুয়া ভাঙ্গা হালভাটঅর ব্যায়াপারে এলাহাবাসীর মিটিংঅত আঁই মনতিরিয়ে ওয়াদা গরগিল। বেয়া¹ুন ছাম্মদি ডঁর গরি মাইকত হঁইল- আজারুদ্দিন লেই ল। শীতহালে নোয়াআঁটখোলা ইস্কুলর মাড়তঅ স্কুলর নতুন বিল্ডিং গইত্য মাইনস্যর দাবিওনিঅ মনতিরিয়ে আজারুদ্দিনরে লেই লইত হইল। তেইর পাটি অক্কলে হয় দে- সরগারর বরাদ্দ পেইরে নেকি গরিব। কিন্তু হঁত্তে যে অইব কেয়াই হইন্নপারে।

চাদ্দোয়ানত বই বদি আমদঅর ওয়াদা, সরগারর বরাদ্দ, ডলু হালর ভাঙ্গার বাধ ক্যাএনে অইব, হত্তে অইব এইসব গপ, জনহল্যান পাটি এদ্দে ধরি মার পাটি অক্কলর তরহাতরহি ওইনতে ওইনতে আদ্দু ছোয়ানর জীবনত্তুন আরঅ তিন্ন্যুা শীতহাল হাড়ি গেইয়ে। হতার হনঅ মা-বাপ পাআ ন যায়। কিন্তু ডলু হালর ভাঙারে হাজত লাগাই গতবার ভোড়ত মোবারক মেম্বারঅ পইল্যাবার কাতলবিলা ইউনিয়অনর চেয়ারমেন অইয়ে। এহন তেই মোবারক চেয়ারমেন। ছিদিক মাস্টরও মোবারক চেয়ারমেনর মেইন মুরব্বী ইসাবে বোড অফিসত নিজর এক্কান চেয়ার পেইয়ে। এ্যাই তিন শীতে আদ্দু ছোয়ানঅর স্মরণশক্তির পাশাপাশি চওগর জ্যোতিঅ হমি আইস্যে। পরিচিত মাইনস্যত্তুনঅ থাই থাই পোছারগরে ওবা অঁনে হঁন? এ্যাই তিন্ন্যুা বারিষাতঅ পানি ওড়ি এলাহাবাসীর ঘর-দুয়ার ডুইপ্পে। হাজির বিলত আরও এব্বিয়াত বালুচর জইম্মে। কিন্তু বদি আমদর ওয়াদার হঁন মা-বাপ দেহা নযায়।

আদ্দু ছোয়ান পিরিচত্তুন পুরুত পুরুত গরি চা হেইতে হেইতে মনে মনে আঁসে আর ভাপে- চাইরমিক্কা মাইনস্যর চঁঅন-চিতঅনরঅ অভাপ নেই বদি আমদঅরঅ ওয়াদাত টান নঁ পরে। আর আজারুদ্দিনর লেই লয়া ত শেষই নইল।

১৬ টি +০/-০